Syantifik yo ap jete kout je sou virus lan, yo wè li gen fòm kouròn pou sa yo rele li viris an kouròn. Se on latriye viris ki ka touche zannimo ak moun.

Premye revelasyon viris sa kay moun te fèt nan lane 1960, lè li manifeste se enfeksyon respiratwa ki bay rim jiska estad pnemopati sevè.

Fòk nou konprann ke viris sa chita kay anpil bèt e li ka bay moun li tou. Epi moun bay moun li nan youn touche lòt, bay lanmen. Anplis si nou ap respire menm lè se sa yo rele transmisyon ayeryen an, nan touse, nan estène. Oubyen lè nou fin touche yon bagay yon kote ki gen viris lan sou li menm pati nan kò a tankou je, nen.. san nou pa lave men nou.

Lè viris lan antre lakay ou nan mwens ke vennkatrè oubyen yon lajounen w ap resanti li pa sentom sa yo : tèt fè mal, tous, gòj fè mal, fyèv, fatig.

An ka prevansyon, li ta bon pou lave men nou nan yon fason regilyè avèk dlo trete e savon pou piti pandan on 20segond. Li ta bon tou si nou nui ak pratik lave men an sèvi ak alkòl, pa manyen pati nan kò nou san nou pa lave men nou. Epi evite ret ak moun ki pran viris lan deja, e si ou pran li, li ta bon pou ou pa plede mache nan lè a,ret lakay ou (an karantèn), pou evite sa ki poko trape li. Esitou pa bliye mete mask paske coronavirus lan ka rantre lakay ou nan lè k’ap respire.

La Chin se youn nan peyi ki frape pa epidemi sa, e kòm gen on gran vilaj sou fas tè a, sa pèmèt kèk peyi anrejistre kèk ka epidemi an lakay yo. Anpil moun ap poze kesyon sou prodwi ki sot la Chin, eske yo ka trape epidemi an si nou fè sèvis ak yo ? Yon chèchè nan Institut Pasteur des Industries opine ke endistri peyi sa estrik nan nòm sanitè ak lòt kesyon tankou transpò, elatriye. Men sa pa anpeche ke kèk produi ki sot la Chin gen sekresyon epidemi an sou yo.

Li rete pou di ke lakay moun, viris coronavirus lakòz pnemoni ki ka rive tiye moun, e ki ka transmèt de moun ak moun. An atandan lasyans bouske rechèch li pou solisyone, li ta bon pou prekosyon pran pou evite anrejistreman ka lanmò ki ka mete tristès nan lavi moun.